O GDR Pontevedra Morrazo en colaboración coa Asociación de viticultores San Martín de Bueu convocan aos viticultores de Bueu a unha charla-coloquio para dar a coñecer o proxecto de posta en valor dos recursos vitivinícolas do concello de Bueu dentro da Indicación Xeográfica Protexida Ribeiras do Morrazo
A charla, que terá lugar o día 6 de agosto ás 18:30 h. no exterior da Escola Torrecino de Cela (Bueu) será o punto de partida dun proxecto que ten como principal obxectivo a ampliación da base territorial e dinamización do sector vitivinícola da IXP Ribeiras do Morrazo para poñer en valor os viñedos de tinta femia, así como outras castes autóctonas, localizados no concello de Bueu e maioritariamente na parroquia de Cela.
Lembremos que o GDR Pontevedra Morrazo xunto con outras entidades do territorio, impulsaron a creación da Indicación Xeográfica Protexida (IXP) “Ribeiras do Morrazo” para amparar os viños elaborados nos concellos de Bueu, Cangas, Moaña, Marín, Vilaboa, Pontevedra, Poio e Redondela. Este distintivo de calidade para os viños do Morrazo foi aprobado pola Comisión Europea o 9 de xaneiro de 2018.
Segundo o Rexistro Vitícola de Galicia, no territorio da IXP Ribeiras do Morrazo, están inscritas preto de 75.000 parcelas, que suman 2.340 hectáreas, pertencentes a 25.414 viticultoras e viticultores. Sen embargo, actualmente so cinco adegas (situadas nos concellos de Marín, Poio, Redondela, Vilaboa e Cangas) e 15 viticultores con 6,91 ha de superficie en produción, están a elaborar viños certificados baixo esta figura.
Polo tanto, en xeral nos concellos do territorio, e de xeito especial en Bueu a Indicación Xeográfica Protexida ten un enorme potencial de crecemento.
Dada a forte tradición e recoñecemento que teñen os viños de Cela, o GDR considera prioritario explorar a viabilidade das diferentes alternativas para aproveitar e poñer en valor as castes e os viñedos da zona, evitar o arranque ou abandono dos mesmos, e impulsar o aumento da superficie en produción certificada dentro da citada Indicación Xeográfica Protexida, contribuíndo así ao desenvolvemento ambiental, económico, social da zona.
Na xuntanza, na que participarán viticultores e operadores da zona, abordarase a problemática da produción, elaboración dos viños, os obxectivos etc. do proxecto para posteriormente analizar e establecer alternativas para a comercialización posta en valor dos viños dentro da IXP.
A Consellería do Medio Rural ven de presentar a Estratexia de dinamización económica, territorial e turística das comarcas vitivinícolas de Galicia, na que participou o GDR Pontevedra-Morrazo, e que persegue consolidar os viños galegos nos mercados nacional e internacional e potenciar tanto a imaxe de marca e identidade como o turismo vinculado aos territorios onde se producen.
O grande obxectivo da Estratexia é mellorar o posicionamento dos viños galegos, aumentar a súa competitividade en mercados nacionais e internacionais e transformar, de aquí a 2026, a capacidade de xeración de valor dos territorios nos que se produce. A Estratexia de dinamización económica, territorial e turística das comarcas vitivinícolas de Galicia artéllase en 46 medidas e 299 accións estruturadas en sete eixes estratéxicos. Así, no primeiro eixe relativo á cooperación, búscase incrementar a dimensión do sector vitivinícola e fomentar a colaboración entre as diferentes comarcas implicadas para afrontar os retos da internacionalización.
No segundo eixe, sobre a viticultura e á produción de uva, habilitarase un programa de mobilidade da terra, recuperación de superficies abandonadas e reestruturación parcelaria para asegurar a rendibilidade das explotacións. A nivel normativo proponse a mellora da xestión das autorizacións de plantacións e para garantir a incorporación de novos viticultores, promoverase un plan de fomento do relevo xeracional, priorizando os candidatos con formación universitaria e formación profesional. Ademais, porase en marcha un sistema de seguimento dos custos de produción que contribúa a mellorar a profesionalización do sector. Mentres, para combater os efectos do cambio climático, a Estratexia contempla o impulso da produción ecolóxica e optimizar a xestión da auga, reducir o uso de fitosanitarios, introducir melloras tecnolóxicas e promover estudos de variedades resistentes a pragas e enfermidades.
No terceiro eixe para o fortalecemento da industria vitivinícola, contémplase impulsar proxectos de cooperación entre pequenas adegas priorizándoos nas axudas públicas e a habilitación de liñas dirixidas a facilitar o acceso ao crédito á industria vitivinícola con mecanismos como o préstamo vendima. No apartado da formación, incidirase na xestión empresarial e nos ámbitos da dixitalización, da cultura do dato e da industria 4.0, cun plan de formación continua para o persoal das adegas. En canto aos estudos universitarios, avaliarase establecer un Grao en viticultura e enoloxía e un curso de posgrao interuniversitario en xestión de empresas vitivinícolas. No relativo á formación profesional, preténdese impulsar os programas de FP dual. A Estratexia tamén aposta por incentivar procesos industriais máis sustentables e favorecer a súa valorización nos mercados cun programa para promover a inclusión das adegas galegas na certificación Wineries for Climate Protection (WfCP) -primeira e única certificación específica para este sector en materia de sostibilidade ambiental- e cunha guía de fomento da sustentabilidade.
No marco do cuarto eixe da comercialización e mercados, proponse deseñar o mapa de posicionamento dos viños de Galicia nos distintos segmentos de mercado en función das tipoloxías de consumidores, diversificar o portfolio de viños cara a tipoloxías como os viños ecolóxicos ou ecosostibles, equilibrar a presenza dos viños galegos nas distintas canles e desenvolver un foro continuado de coñecemento, debate e análise sobre a evolución, tendencias e retos que afronta a comercialización de viño. Para fomentar a transformación dixital, a Estratexia propón un Plan de conectividade e o impulso da dixitalización, unha campaña de lanzamento da marca Viños de Galicia nos mercados internacionais e un espazo dixital para o desenvolvemento e impulso da promoción e comercialización internacional dos nosos viños. Así mesmo, crearase a Oficina dixital de apoio á exportación e elaborarase un Plan de exportación anual que contemple actuacións como as misións internacionais ou encontros con distribuidores.
Ao abeiro do quinto eixe de organización e funcionamento, prevese realizar un informe sobre a necesidade de introducir nas normativas das denominacións de orixe mecanismos de regulación de oferta plurianuais, mediante reservas individuais cuantitativas e/ou cualitativas de produción, que permita unha certa marxe de flexibilidade para compensar as variacións anuais da produción vitivinícola. Tamén se quere avaliar a posibilidade de distinguir dentro de cada D.O.P. unidades xeográficas menores con particularidades específicas e promover contratos entre viticultores e adegas de maior duración temporal, asegurando unha repartición equilibrada do valor xerado entre os diferentes elos da cadea produtiva.
No sexto eixe relativo ao turismo e ao enoturismo, búscase eliminar as restricións á implantación de adegas e complexos enoturísticos en solos rústicos, incorporar novas categorías de aloxamentos turísticos vinculados ao enoturismo, realizar campañas de concienciación sobre as oportunidades deste negocio e crear liñas de axuda ao efecto. Ao tempo, reforzaranse as sinerxías entre o enoturismo e os recursos paisaxísticos e patrimoniais, estreitando os vínculos entre comida e viño, ademais de promover unha rede de aldeas viñateiras para fixar poboación e dinamizar a economía local. Así mesmo, mellorarase o funcionamento e coordinación das Rutas do Viño do Ribeiro, Monterrei, Valdeorras e Ribeira Sacra, solicitando a súa adhesión e certificación por parte de ACEVIN. No eido da promoción, integrarase a oferta de enoturismo con eventos turísticos recoñecidos coma os entroidos das comarcas da Limia, Verín, Trives ou Viana ou a Festa da Istoria de Ribadavia, reforzarase a promoción de iniciativas de Turismo de Galicia como “Escenarios ao volante” ou “Paseando entre viñedos” e promoveranse estratexias de marketing dixital no enoturismo. Mentres, no campo da formación, proponse reforzar a FP e os estudos universitarios con propostas relacionados co enoturismo e coa cultura vitivinícola.
Por último, no sétimo eixe relacionado co patrimonio natural, cultural e a paisaxístico, proponse a redacción dun atlas das paisaxes vitivinícolas de Galicia, a realización dun inventario dos viñedos máis antigos para a súa protección e promoción e a posibilidade de catalogar as paisaxes máis características, entre outros aspectos.
A Consellería do Medio Rural ven de publicar no DOG. Nº60 do 30 de marzo de 2021 as bases reguladoras das axudas á reestruturación e reconversión da viña en Galicia e a súa convocatoria para o ano 2021 (código de procedemento MR446A). O prazo de presentación de solicitudes será dun mes, que se contará desde o día seguinte ao da publicación da orde no Diario Oficial de Galicia e presentaranse obrigatoriamente por medios electrónicos a través do formulario normalizado (anexo I) dispoñible na sede electrónica da Xunta de Galicia: https://sede.xunta.gal. Segundo o estipulado nas bases poderán ser beneficiarios destas axudas as persoas viticultoras e futuros viticultores cuxos viñedos se destinen á produción de uva para vinificación. Enlace ás bases reguladoras e á convocatoria:
https://www.xunta.gal/dog/Publicados/2021/20210330/AnuncioG0426-250321-2_gl.html
O GDR Pontevedra-Morrazo ven de lanzar o sorteo dunha selección de 12 botellas de viño das castes máis singulares da Indicación Xeográfica Protexida (IXP) Ribeiras do Morrazo dentro dos agasallos promovidos na campaña de dinamización dos GDR de Galicia #OruralviveViveorural.
Para participar, tes que seguir a páxina de Facebook dos Grupos de Desenvolvemento Rural de Galicia (https://www.facebook.com/gdrsdegalicia/) e darlle un #gústame ao post coa publicación do sorteo antes das 20.00 horas do vindeiro día 13 de decembro. Moita sorte!
Instrucións paso a paso:
E lembra que podes compartir o #sorteo no teu muro e mencionar aos teus amigos nos comentarios para que tamén poidan participar!
O sorteo realizarase de forma automática con #Easypromos: http://bit.ly/FBsorteo
Os vindeiros días 9, 10 e 11 de novembro no Recinto Feiral de Pontevedra a Indicación Xeográfica Protexida RIBEIRAS DO MORRAZO estará presente na feira do gourmet galego Etiqueta Negra, da man do GDR Pontevedra Morrazo coa intención de poñer en valor e consolidar a imaxe da IXP no mercado.
Trátase dunha cita gastronómica, que reunirá nun mesmo espazo a profesionais do sector, produtores e consumidores co fin de coñecer as tendencias de mercado, identificar novas liñas de negocio e difundir a excelencia dos produtos gourmet e delicatessen galegos.
Nesta cuarta edición, poderanse coñecer e degustar os viños desta nova Indicación Xeográfica protexida vitivinícola e apreciar todos os matices destes viños oceánicos a través das catas comentadas.
Máis información
O GDR Pontevedra Morrazo está a colaborar no Proxecto "A gastronomía fai camiño" solicitado pola Asociación de GDR de Galicia dentro do Programa O teu Xacobeo da Xunta de Galicia.
Os obxectivos do proxecto son:
-A elaboración dunha guía de pratos tradicionais e de producións locais e de tempada polas comarcas por onde transcorren os distintos Camiños de Santiago.
-A realización dunha degustación destas receitas convidando aos restaurantes dese Camiño coa finalidade de animar aos hostaleiros a ofertar un menú para as persoas que peregrinen e o turismo en xeral elaborado con producións locais, tradicionais e de tempada.
A través do proxecto A gastronomía fai camiño preténdese poñer en valor a gastronomía local e tamén dar a coñecer as tradicións asociadas aos produtos de cada zona.
Con tal motivo, o GDR Pontevedra Morrazo en colaboración coa Asociación de GDR de Galicia organizou este martes 8 de outubro un showcooking/degustación no Restaurante El Cafetín en Pontevedra con elaboración de tapas baseadas na gastronomía local e maridadas con viños da IXP Ribeiras do Morrazo.
A este acto estiveron convidados a participar os restaurantes así coma os Grupos de Desenvolvemento Rural do territorio por onde transcorre o Camiño Portugués.
Un ano máis o GDR Pontevedra-Morrazo participou no II Encontro Leader Galicia que tivo lugar na Estrada adicado ao turismo como dinamizador do rural. O evento organizado pola AGADER e a Asociación de GDR de Galicia contou, entre outros, coa presenza do conselleiro de Medio Rural, José González, e coa do director de Agader, Miguel Pérez Dubois. O acto celebrouse nunha carpa aberta na Praza do Concello onde os 24 GDR expuxeron vídeos e imaxes de cada territorio e na que o GDR Pontevedra-Morrazo presentou o novo material promocional de Enoturismo da Indicación Xeográfica Protexida Ribeiras do Morrazo baixo o lema "A emoción de deixarse levar".
Ademais, entre outras actividades, tivo lugar a presentación da primeira edición dos premios Leader, unha degustación de produtos dos 24 territorios e a presentación de grandes fitos turísticos dos GDRs.
O GDR Pontevedra Morrazo promocionará a IXP Ribeiras do Morrazo no Festival Internacional de Curtametraxes de Bueu (FICBUEU 2019) a través da difusión nas diferentes seccións do festival, do material audiovisual da marca así como das catas/degustacións dos actos de inauguración e clausura previstos.
O FICBUEU é unha cita cultural única, na que participarán máis de 15.000 persoas que a longo de nove días ( do 6 ao 14 de setembro) poderán desfrutar dun total de 128 filmes e de 65 actividades programadas.
Máis info: https://www.ficbueu.com/
Os participantes no programa formativo "Profesionalización e desenvolvemento da viticultura na IXP Ribeiras do Morrazo (2019)", no marco de cooperación entre as IXP de viños de Galicia, tiveron ocasión de realizar unha visita de estudo á IXP Val do Miño.
Nesta xornada coñeceron a finca e adega de Terras Mancas, unha das poucas adegas que na actualidade elaboran viño baixo o selo da IXP Val do Miño. Os socios ensinaron o viñedo e as instalacións, e explicaron aos asistentes tanto o proceso de constitución do seu proxecto, como as súas dificultades, o presente e os proxectos de futuro.
Ademais, nesa mesma xornada, realizouse unha visita de estudo ao proxecto colaborativo: Solaina Minei. As Bouzas – Macendo (Castrelo de Miño). Un proxecto colaborativo dos veciños do lugar de As Bouzas, situado na D.O. Ribeiro, que baixo a fórmula dunha SL, pero traballando conxuntamente, crearon no 2008 O Polígono Agrario da Asociación "As Bouzas", un proxecto de produción vitivinícola. Actualmente son 54 socios, todos eles viticultores ou fillos de viticultores, que antes de que as viñas quedasen ermas; xuntáronse para facer realidade o proxecto.
O obxecto social da SL foi redactado de xeito máis amplo que o vitivinícola sendo parte do mesmo a producción, transformación e comercialización de produtos agrícolas, gandeiros e forestais, e atender a calquera fin ou servizo que sexa propio ou estea directamente relacionado con estas actividades, en particular, coa explotación da madeira.
Na actualidade xa empezaron a elaborar o seu propio viño baixo a marca “9 queipos”, aínda que a maior parte da uva é vendida a terceiros.
Representantes dos socios ensinaron o viñedo e as instalacións, e explicaron aos asistentes todo o camiño levado a cabo dende a súa constitución.
Agradecer a todos a atención dispensada, así como a súa colaboración na xornada explicando os elementos esenciais das súas iniciativas e a posterior visita guiada ás instalacións.
O venres 12 de abril, no marco do programa formativo Profesionalización e desenvolvemento da viticultura na IXP Ribeiras do Morrazo (2019) que este GDR está a desenvolver, celebrouse na Casa do pobo de Beluso, en Bueu, unha sesión formativa centrada no emprendemento cooperativo na que diversos poñentes falaron da creación de iniciativas empresariais vitivinícolas e na que se analizaron distintas fórmulas colaborativas de traballo organizativo e produtivo.
Na mesma contouse coa participación dos seguintes expertos na materia:
Tamén se organizou unha mesa redonda na que participaron os seguintes relatores:
