O asociacionismo no sector vitivinícola e a recuperación de terras para o seu cultivo serán os temas centrais das xornadas divulgativas que se celebrarán en Valga e Rianxo os días 24 e 25 de maio. O sábado 28 terá lugar no Pazo de Goiáns (Boiro), o Túnel do viño, no que profesionais da hostalaría e público xeral poderán coñecer os viños desta IXP e das outras tres que existen en Galicia. Ese mesmo día, celebrarase un acto institucional de apoio no que participarán representantes de concellos e da administración pública.  

Descargar Programa Valga, Rianxo e Túnel do viño en Boiro 

A asistencia aos eventos é gratuíta e as prazas son limitadas. Por iso é necesario inscribirse a través da web viños.ixp.gal.

Dentro do proxecto de cooperación Viños das IXP de Galicia, que percorre todo o territorio galego, celebraranse durante unha semana unha serie de eventos destinados a coñecer e impulsar os viños que se elaboran baixo as catro Indicacións Xeográficas Protexidas que existen en Galicia. Os viños das IXP son viños de calidade, auténticos e diversos, que maneteñen valores artesanais con arraigamento histórico e empregan materias primas naturais coidadas por produtores locais. De aí o lema da campaña que acompaña o proxecto: «Viños que falan de nós»

As xornadas divulgativas estarán centradas no asociacionismo do sector e na recuperación de terras para o cultivo, polo que as protagonistas serán as quince adegas que colaboran no proxecto. Participarán tamén a Directora Xeral de Desenvolvemento Rural, Inés Santé Riveira, o Director Xeral da Axencia Galega da Calidade Alimentaria, José Luís Cabarcos, alcaldes, representantes da administración pública e dos Grupos de Desenvolvemento Rural Deloa e Salnés-Ulla-Umia, así como do resto de GDRs que cooperan no proxecto.


No túnel do viño poderanse probar viños das catro IXP de viño de Galicia en catas comentadas que se celebrarán ao longo do día, poñendo o foco nos da IXP Terra de Barbanza-Iria.

 

Programa

Martes 24 de maio
Valga (Centro de Interpretación da Caña do País)

18:30
Benvida institucional
José María Bello Maneiro (Alcalde de Valga)
Juan Manuel Vidal Seage (Alcalde de Pontecesures. Presidente do GDR Salnés-Ulla-Umia)
José Luis Cabarcos Corral (Director Xeral da Axencia Galega da Calidade Alimentaria.Consellería do Medio Rural)

18:45
Novo marco normativo da calidade alimentaria en Galicia
José Luis Cabarcos Corral

19:10
Implicacións da Lei da cadea alimentaria para as adegas das IXP de Viños de Galicia
Xosé Manuel Fernández Castro (Xefatura Territorial de Pontevedra da Consellería do Medio Rural

19:35
Conclusións do Taller sobre asociacionismo das IXP e implicacións normativas

20:15
Degustación de viño da zona
Adega Torres Augusti

Mércores 25 de maio
Rianxo (Auditorio Municipal)

17:30
Benvida institucional
Adolfo Muíños Sánchez (Alcalde de Rianxo. Secretario do GDR Deloa)
Inés Santé Riveira (Directora Xeral de Desenvolvemento Rural. Consellería do Medio Rural)
Francisca Gago Guillán (Xerencia do GDR Deloa)

17:45
A lei de recuperación de terra agraria de Galicia
Inés Santé Riveira

18:15
Faladoiro: Como empregar a normativa para o desenvolvemento vitícola na IXP. Aproveitamento de terras para a viticultura na IXP Barbanza-Iria
Inés Santé Riveira
Adolfo Muíños Sánchez
Adegueiros da IXP

19:45
Degustación de viño da zona:
Cazapitas, Adega Entre os Ríos e Bodegas Antonio Saborido

Sábado 28 de maio
Boiro (Pazo de Goiáns)

12:00
Visita ao Pazo de Goiáns e á mostra dos viños das IXP

12:30
Acto institucional de apoio e promoción dos viños da IXP Terra de Barbanza e Iria

17:00
Catas de viño comentadas para profesionais (canle HORECA)

18:30
Catas de viño comentadas abertas ao público

 

Un proxecto de cooperación 

6 Grupos de Desenvolvemento Rural (GDR) e 15 Adegas das 4 Indicacións Xeográficas Protexidas (IXP) de viños de Galicia xuntan os seus esforzos nun proxecto de cooperación para dinamizar o sector vitivinícola e contribuír a súa consolidación e crecemento futuro. 

Os obxectivos do proxecto son dinamizar os operadores e establecer canles de colaboración entre as catro IXP vitícolas de Galicia, impulsando o sector vitivinícola en cada un dos territorios; contribuír a consolidar e/ ou aumentar o número de marcas comerciais; mellorar as canles de divulgación, promoción e comercialización dos viños así como a formación en proxección e comercialización dos elaboradores, favorecendo un maior coñecemento das IXP e unha mellor percepción social das propias comarcas amparadas. Tamén se busca favorecer o posicionamento como destino enoturístico das comarcas que forma cada IXP.


O proxecto está co-financiado pola Axencia Galega de Desenvolvemento Rural da Xunta de Galicia, o Ministerio de Agricultura, Pesca e Alimentación e o Fondo Europeo Agrícola de Desenvolvemento Rural a través da submedida LEADER 19.3 Cooperación, do Programa de Desenvolvemento Rural de Galicia 2014-2020.

Publicado en novas
Adega Os Areeiros, de Vilaboa, ven de acadar un dos 15 premios Gran Ouro co seu albariño na categoría de viños brancos tranquilos no IV Concurso Nacional de viños Vinespaña. O certame organizado pola Federación Española de Enoloxía (FEAE) tivo lugar do 28 ao 30 de abril no Balneario de Laias, en Cenlle (Ourense). 
Ademais, o albariño Praia do Santo da Adega Ardán, ubicada en Marín, tamén conseguiu unha medalla de Prata na mesma categoría, e Os Areeiros outro Ouro na modalidade de viños de variedades minoritarias.
SOMOS UNHA MARCA DE GARANTÍA, SOMOS CALIDADE.
Ribeiras do Morrazo, SER QUEN SOMOS.
Viños das IXP de Galicia, VIÑOS QUE FALAN DE NÓS.
Publicado en novas

Durante todo o día tivo lugar, no Centro Cultural Marcos Valcárcel (Ourense), a segunda Xornada de divulgación e Túnel do viño das Indicacións Xeográficas Protexidas (IXP) de Galicia, na que foi protagonista a IXP Val do Miño-Ourense. Institucións, adegueiros, profesionais da hostalería e público xeral brindaron polos viños das IXP de Galicia, viños de calidade e comprometidos coa preservación do noso patrimonio cultural e vitivinícola.

Gabriel Alén Castro (Delegado Territorial da Xunta de Galicia en Ourense), Luis Jorge Álvarez Ferro (Xefe Territorial da Consellería do Medio Rural), Rosendo Luis Fernández Fernández (Vicepresidente da Deputación de Ourense), Moisés Blanco Paradelo (Subdirector Xeral de Relacións cos GDR) Rogelio Martínez (Expourense), Manuel Seoane Rodríguez (Presidente de ADERCOU) e representantes dos Concellos de Amoeiro, Barbadás, Cartelle, Coles, Gomesende, Nogueira de Ramuín, Ourense, Padrenda, O Pereiro de Aguiar, A Peroxa, Pontedeva, Quintela de Leirado, San Cibrao das Viñas e Toén e dos diferentes Grupos de Desenvolvemento Rural que participan no proxecto brindaron, xunto con adegueiros, despois da lectura dun manifesto de apoio institucional aos viticultores e viticultoras que a través da súa actividade recuperan vides e castes autóctonas e preservan a paisaxe, contribuíndo á promoción e posta en valor dos seus produto e promovendo un consumo responsable e saudable.

A xornada divulgativa comezou coa benvida institucional a cargo de Armando Ojea Bouzo, Tenente de Alcalde do Concello de Ourense, que deu paso a Moisés Blanco Paradelo,  Subdirector Xeral de Relacións cos GDR. AGADER / Xunta de Galicia, que fixo fincapé na necesidade de poñer en valor a cultura do viño a través das IXP e destacar o beneficioso impacto na recuperación de patrimonio e posta en valor de recursos enoturísticos. Manuel Seoane Rodríguez, Presidente de ADERCOU e Alcalde de A Peroxa, presentou o proxecto de cooperación e dinamización das IXP de viño de Galicia no que se enmarca este evento.

Na seguinte mesa tiveron protagonismo as adegas. Maite Maestre Manteca, xerente de Vides Singulares, explicou que o seu é un proxecto de viticultura e vida, situado na casa reitoral de Santo Eusebio (Concello de Coles), un edificio do século XVII que poñen en valor dentro da súa oferta de enoturismo. Jorge Pereira Chao, un dos tres socios de Adega Terras Mancas, explicou o como levan anos recuperando terras de cultivo en Soutomanco, na parroquia de Trasalba, Amoeiro (Ourense). Os adegueiros estiveron acompañados do profesor José Eduardo López Pereira, que fixo un percorrido histórico polos puntos de maior interese patrimonial da IXP Val do Miño-Ourense.

Por último, Isabel Otero Pombo, da Oficina Agraria Comarcal de Ourense da Consellería de Medio Rural e máis o experto en viticultura Francisco Rego Martínez fixeron un repaso polas características que distinguen os viños desta Indicación e da importancia da IXP como garante de calidade dos seus produtos.

Pola tarde, no Túnel do viño, case un cento de persoas tanto do sector da hostalaría como público xeral puideron coñecer e probar viños das catro Indicacións Xeográficas Protexidas de Galicia, a través de catas comentadas polo sumiller Martiño Santos Canosa, que puxo o foco nas potencialidades dos viños das IXP para como complemento dunha oferta gastronómica actual, así como a singularidade das diferentes marcas que se comercializan baixo cada unha das Indicacións, que nos permiten coñecer novas variedades de uvas.

Publicado en novas

O vindeiro luns 2 de maio celebraranse, no Centro Cultural Marcos Valcárcel (Ourense), as segundas Xornadas de divulgación e Túnel do viño das Indicacións Xeográficas Protexidas de Galicia, que terán como protagonista a IXP Val do Miño-Ourense. A asistencia ás xornadas e ás catas comentadas é gratuíta, pero compre inscrición a través do formulario.

Descarga Programa

Este evento ten lugar dentro do proxecto para a dinamización dos viños das IXP de Galicia, que coordina o GDR Pontevedra Morrazo e no que participan 6 Grupos de Desenvolvemento Rural (Grupo De Desenvolvemento Rural Adercou Gdr Salnes Asociación Deloa Eu Rural Reserva de Biosfera Mariñas Coruñesas e Terras do Mandeo) e 15 adegas das diferentes indicacións de Galicia. Está cofinanciado pola Axencia Galega de Desenvolvemento Rural da Xunta de Galicia, o Ministerio de Agricultura, Pesca e Alimentación e o Fondo Europeo Agrícola de Desenvolvemento Rural a través da submedida LEADER 19.3 Cooperación, do Programa de Desenvolvemento Rural de Galicia 2014-2020.

Resumo programa das xornadas/túnel do viño 

Data: 2 de maio. Lugar: Centro Cultural Marcos Valcárcel. Ourense

10:00
Recepción e rexistro das persoas participantes

10:30
Benvida institucional

10:45
Presentación do proxecto de cooperación «Dinamización e promoción das IXP de Viños de Galicia»
Asociación de Desenvolvemento Rural da Comarca de Ourense (Adercou)

11:00
Tradición histórica na IXP Val do Miño-Ourense:
Adega Terras MancasVides Singulares e José Eduardo López Pereira (Presidente da Fundación Otero Pedrayo)

12:00
Situación e contexto da IXP Val do Miño-Ourense no panorama vitícola
Isabel Otero e Antonio Troitiño López (Consellería do Medio Rural)
Francisco Rego Martínez (Experto en viticultura)

13:00
Acto institucional de apoio e promoción dos viños da IXP Val do Miño-Ourense

17:00
Catas de viño comentadas para profesionais (canal HORECA)

18:30
Catas de viño comentadas abertas ao público

 

Publicado en novas

Despois da posta en marcha do proxecto de cooperación "Dinamización e promoción das IXP de viños de Galicia" a finais de 2021 baixo o lema «Viños das IXP de Galicia, viños que falan de nós» nunha xornada de presentación no Pazo da Cultura de Pontevedra e nun encontro que xuntou viticultores e responsables políticos comprometidos co apoio aos valores diferenciais destes e ao modelo de sustentabilidade económica e social que supón a súa produción, este ano 2022 estará cheo de citas onde seguir coñecendo todo o que os viños das IXP de Galicia teñen que dicir sobre o seu carácter, a súa calidade, a súa diversidade e os beneficios que teñen para os territorios onde se producen.

Se ese fondo vínculo co territorio é unha das principais características dos nosos viños, as actividades estarán tamén repartidas atendendo á diversidade de lugares onde se producen. Isto será unha estupenda oportunidade para coñecer catro zonas xeográficas de grande potencial enoturístico e gastronómico. Así, realizaranse Xornadas Túneles do viño nas área de BetanzosTerra de Barbanza e IriaVal do Miño-Ourense e Morrazo en coordinación cos diferentes Grupos de Desenvolvemento Rural que participan no proxecto: Pontevedra-MorrazoEururalDELOAMariñas-BetanzosADERCOU e Salnés-Ulla-Umia, que están traballando actualmente en cooperación cos axentes locais no deseño das actividades para facelas participativas e transversais.

Xornadas e Túneles de Viño

As Xornadas terán un carácter dinamizador e divulgativo. A través destes encontros, abordaranse retos de futuro para o sector como a dinamización da viticultura e a procura dunha mellor percepción social e coñecemento das IXP, dos seus viños e dos territorios. Cada xornada estará centrada nun aspecto de interese: o asociacionismo e cooperación entre os produtores de viños con IXP de Galicia, a viticultura como elemento dinamizador do rural e de loita contra o despoboamento, a regulación da calidade alimentaria e a súa protección diferencial, así como a situación actual e perspectivas de futuro (tendencias no consumo de viños, melloras organolépticas, innovación…).

Os Túneles do Viño serán os espazos de exposición e degustación das marcas que se producen baixo as catro indicacións, a través de catas nas que poderán participar tanto profesionais como público xeral interesado en coñecer os produtos naturais e de calidade certificada.  

As persoas interesadas en asistir aos diferentes eventos irán atopando a información práctica de axenda e inscrición na sección de novas da nosa web ou as nosas redes sociais (Facebook e Instagram). 

Ademais, a nosa web seguirá crecendo como espazo de divulgación de información sobre cada unha das IXP de viño de Galicia, das adegas que participan no proxecto e as marcas que comercializan, así como catálogo de recursos enoturísticos gastronómicos. 

Presenza en Revera Vinum e FENAVIN

Os viños con IXP contarán cun espazo propio en Revera Vinum, I Encontro do Viño Galego que se celebrará en Santiago de Compostela entre o 22 e o 24 de marzo no Hotel Monumento San Francisco. Revera Vinum, impulsado pola Asociación Hostalaría Compostela, pretende dar a coñecer, promover e difundir os viños galegos entre os profesionais do sector, a poboación local e os turistas que visitan Santiago de Compostela no contexto do Xacobeo 21-22. Ademais dun espazo de exposición onde varias adegas amosarán as súas marcas, o encontro contará con ponencias, mesas de debate e catas impartidas por algúns dos máis coñecidos sumilleres, enólogos e catadores galegos e do resto de España, como Xurxo Alba, Paula Fandiño, Rafael Palacios, Luis e Alejandro Paadín, Alberto Varela ou Salomé Beiroa.

Varias das nosas adegas estarán presentes tamén en FENAVIN (Ciudad Real, 12-14 de maio), a feira de viños de referencia en España. As adegas asistirán de forma conxunta baixo a marca Viños das IXP de Galicia xunto coas Denominacións de orixe de viño e as IXP de licores tradicionais, a través dun espazo conxunto baixo a marca Galicia á que dará soporte a Consellería do Medio Rural.

Publicado en novas

Avanza o proxecto de cooperación das IXP de viños de Galicia ca programación de eventos e actividades para a IXP Terra de Barbanza e Iria. Á reunión celebrada na sede do GDR Deloa asistiron representantes dos Concellos de Pontecesures, Valga, Catoira, Boiro, Rianxo, e os representantes das adegas colaboradoras Entre Os Ríos, Cazapitas, Antonio Saborido e Torres Augusti. Ademais de contar coa asistencia técnica de Cidadania S. Coop. Galega, e dos xerentes do GDR Pontevedra Morrazo, grupo coordinador do proxecto, GDR Deloa e Salnés-Ulla-Umia.

Máis información: https://youtu.be/adstdlWh8mE

Publicado en novas

Máis información e fotos: https://www.facebook.com/media/set/?vanity=vinos.ixp.gal&set=a.121618863647547

Unha ampla representación institucional deu lectura á declaración institucional de apoio aos viños elaborados baixo as Indicacións Xeográficas Protexidas de Galicia e nomeadamente aos da IXP Ribeiras do Morrazo, diante de adegueiros de todos os territorios que se achegaron este sábado á inauguración do 1º Túnel dos Viños das IXP de Galicia.

O Evento, que se celebrou na sede do GDR Pontevedra Morrazo, enmarcase dentro do proxecto de cooperación      “Dinamización e promoción das IXP vitícolas de Galicia” no que participan os 6 GDR (Pontevedra Morrazo, Galicia Suroeste Eurural, Mariñas-Betanzos, Comarca de Ourense, Salnés-Ulla-Umia e Deloa) e 15 adegas dos territorios das IXP.

No Acto participaron José Luis Cabarcos Corral, director da Axencia Galega da Calidade Alimentaria; Miguel Anxo Fernández Lores, alcalde de Pontevedra e María Ramallo Vázquez, alcaldesa de Marín, que deu lectura do manifesto rodeada dos alcaldes do resto dos concellos que forman parte da IXP Ribeiras do Morrazo, así como representantes da Deputación de Pontevedra, Concello de Ponte Caldelas, o Servizo de Industrias Agroalimentarias da Xunta de Galicia, a Asociación de GDRs de Galicia, o Concello de Pontecesures, o Concello de Caldas de Reis, así como as adegas colaboradoras e os Grupos de Desenvolvemento Rural cooperantes. 

No evento, o presidente do GDR Pontevedra-Morrazo e alcalde de Pontevedra, Miguel Anxo Fernández, destacou a importancia das Indicacións Xeográficas Protexidas para poder seguir ampliando as áreas de cultivo e conservar viñas ancestrais. Sinalou que e diversidade que reúnen os viños das Indicacións Xeográficas Protexidas de Galicia é unha oportunidade para introducirse nun mercado no que os consumidores valoran cada vez máis a variedade e a singularidade dos produtos. 

José Luis Cabarcos Corral, director da Axencia Galega da Calidade Alimentaria, dirixiuse aos adegueiros presentes destacando o compromiso da administración pública coa produción das IXP e coincidiu na importancia da compoñente diferencial e de calidade para favorecer a comercialización internacional dos viños de Galicia.

Declaración institucional

A alcaldesa de Marín, María Ramallo Vázquez, deu lectura da declaración institucional de apoio dos concellos aos viños das IXP de Galicia, que partiu da consideración das «IXP como importante ferramenta para o desenvolvemento rural, que como marca colectiva da viabilidade a pequenas producións locais [...] e que ademais de dar a coñecer o territorio potencian outras actividades económicas complementarias». É por isto que os concellos de Bueu, Cangas, Marín, Moaña, Poio, Pontevedra, Redondela e Vilaboa se comprometen a «contribuír á promoción e posta en valor destes viños», especialmente dos amparados na IXP Ribeiras do Morrazo da que forman parte, «apoiando as adegas, facilitando a participación en eventos públicos, empregando os seus viños nos actos celebrados polas institucións», promovendo a cooperación e tamén o seu «consumo responsable e saudable.

Exposición dos viños das IXP de Galicia e catas comentadas.

Con este acto institucional inaugurouse o primeiro dos Túneles do Viño das IXP de Galicia. Os túneles son espazos de mostra e difusión dos viños. Contan cun espazo expositivo onde se describe o contexto cultural e xeográfico dos viños das catro IXP de Galicia: Val do Miño-Ourense, Terra de Barbanza e Iria, Terrra de Betanzos e Terras do Morrazo. Ademais, ao longo do día desenvolvéronse catas comentadas dirixidas a diferentes perfís: institucionais, hostelaría, prescritores e público xeral nas que participaron máis de cen persoas que puideron coñecer de primera man as propiedades duns viños «que falan de nós», da terra, do lugar, da súa orixe, e en definitiva que falan da memoria do que somos e do que queremos ser.

O proxecto está cofinanciado pola Axencia Galega de Desenvolvemento Rural da Xunta de Galicia, o Ministerio de Agricultura, Pesca e Alimentación e o Fondo Europeo Agrícola de Desenvolvemento Rural a través da submedida LEADER 19.3 Cooperación, do Programa de Desenvolvemento Rural de Galicia 2014-2020.

Máis información e fotos: https://www.facebook.com/media/set/?vanity=vinos.ixp.gal&set=a.121618863647547

 

Publicado en novas

Onte xuntámonos con adegueiros, institucións e expertos en viticultura participantes no Pazo da Cultura de Pontevedra para poñer en marcha o proxecto de cooperación para a dinamización dos Viños das IXP de Galicia. Foi unha xornada na que se sentiu a paixón e a singularidade duns viños que falan de nós.

Publicado en novas

6 Grupos de desenvolvemento rural e 15 Adegas das 4 Ixp de viños de Galicia xuntan os seus esforzos nun proxecto de cooperación  para dinamizar o sector vitivinícola e contribuír a súa consolidación e crecemento futuro

Descargar Programa acto de presentación

Descargar Folla de inscrición 

O proxecto, cuxo acto de presentación, celebrarase o 4 de novembro ás 17.30 h no Pazo da Cultura de Pontevedra, ten como obxectivos xerais:

  • Dinamizar aos operadores e establecer canles de colaboración entre as catro IXP vitícolas de Galicia.
  • Impulsar o sector vitivinícola en cada un dos territorios
  • Contribuír a consolidar e/ou aumentar o número de marcas comerciais.
  • Mellorar as canles de divulgación, promoción e comercialización dos viños.
  • Mellorar a formación en proxección e comercialización dos elaboradores.
  • Favorecer un maior coñecemento das IXP e unha mellor percepción social das propias comarcas amparadas.
  • Favorecer o posicionamento enoturístico.

E como obxectivos específicos:

  • Dar a coñecer entre as persoas consumidoras os viños e a realidade das IXP como selo de garantía e calidade.
  • Ofrecer aos elaboradores a oportunidade de presentar os seus viños en distintos foros e formatos, tanto ás persoas consumidoras como ó sector da distribución e a restauración.
  • Conseguir a colaboración das administracións locais na promoción dos viños das IXP mediante a participación en eventos da súa competencia.
  • Establecer acordos de colaboración co sector da restauración local para a promoción dos viños das IXP
  • Posicionamento dixital (Web e RRSS) das IXP.
  • Identificar os elementos de interese enoturístico nos catro territorios para o seu posterior desenvolvemento.
  • Espertar o interese e curiosidade dos visitantes por coñecer os viños dos territorios de cada unha das IXP de Galicia

Actuacións previstas.

As accións previstas no proxecto de cooperación parten dun plan de dinamización e promoción das IXP no que se establecen obxectivos e se definen estratexias, actuacións, medios, etc. así como a xestión, control e seguimento das mesmas.

  • Por unha banda haberá actividades de dinamización, divulgación e animación interna como as 6 xornadas (unha en cada GDR cooperante) nas que se abordarán os retos de futuro, a dinamización da viticultura e a procura dunha mellor percepción social e coñecemento das IXP, dos seus viños e dos territorios.
  • Eventos e actividades de promoción/degustación como os 4 túneles do viño (un por cada Indicación xeográfica protexida) coa presenza de todas as adegas promocionando conxuntamente os seus viños e facilitando a súa degustación e coñecemento.
  • Posicionamento dixital das IXP mediante a construción dunha plataforma web promocional, e a elaboración dun plan de comunicación e difusión nas RRSS e outros medios que animen e apoien todo o proceso.
  • Desenvolvemento enoturístico. Identificando os elementos, contidos e actividades de interese enoturístico, e creando unha rede de establecementos colaboradores coas IXP a partires dun receitario de menús enogastronómicos. Complétase está acción coa asistencia técnica para a elaboración dun documento-guía de adaptación das adegas ao enoturismo que lles permita, aos operadores das IXP, crear e/ou mellorar nas súas instalacións zonas de exposición de viños, cata , degustación, etc.

Xornada de presentación e Túnel do viño en Pontevedra

A primeira xornada de dinamización, que servirá como acto de presentación do proxecto,  celebrarase o 4 de novembro ás 17.30 h no Pazo da Cultura de Pontevedra  e contará cun espazo para a divulgación, centrado na calidade dos viños amparados polas IXP, a cargo da Axencia Galega da Calidade Alimentaria (Agacal) e unha mesa redonda. 

Na mesa redonda abordaranse entre outros temas,  a importancia dos recursos enoturísticos, as oportunidades de mercado, os novos modelos de consumo e a caracterización oceánica e ribeirá dos viños das indicacións galegas. Participarán Luís Paadín (profesor e Técnico de Viticultura e Enoloxía da Universidade de Vigo), Antonio Portela (experto en cata de viños, viticultura e enoloxía) e Rafa Quintía (antropólogo e economista). Xunto pódese descargar folla de inscrición e programa.

Está aberta a inscrición ao público a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo. ou a través de teléfono no número 685 722 084 para atender aos protocolos sanitarios en materia da Covid19.

Os túneles do viño son outra das actividades contempladas no proxecto. Parellas ás xornadas realizaranse os mesmos no territorio de cada unha das IXP de viño galegas. Celebrarase un túnel en cada unha das indicacións xeográficas protexidas dos viños de Galicia, en total catro. O primeiro dos túneles, correspondente á IXP Ribeiras do Morrazo, realizarase en Pontevedra o día 20 de novembro de 2021 na nova sede do  grupo coordinador, GDR Pontevedra Morrazo no lugar de Os Campos nº 19 de Mourente.

Os túneles funcionarán como espazo de mostra e promoción de todas as referencias de viño amparadas baixo o selo das IXP, ao tempo, que serán espazos de degustación nos que apreciar as características diferenciais dos mesmos.

Realizaranse varias catas, ao longo do día, co obxectivo de facilitar a participación de diferentes perfís sociais: institucional, canal HORECA, sector, e outros axentes.

Ademais contémplase, a sinatura dun acordo institucional, para a promoción dos viños, no que se pretenden acadar a participación das entidades locais que forman parte das IXP.

Financiamento

O proxecto que conta cun orzamento de preto de 100.000€ está cofinanciado pola Axencia Galega de Desenvolvemento Rural da Xunta de Galicia, o Ministerio de Agricultura, Pesca e Alimentación e o Fondo Europeo Agrícola de Desenvolvemento Rural a través da submedida LEADER 19.3 Cooperación, do Programa de Desenvolvemento Rural de Galicia 2014-2020.

Entidades colaboradoras

O proxecto conta coa participación activa e contribución ao financiamento do proxecto dos propios operadores das diferentes IXP. En concreto conta coa colaboración de 15 adegas que se distribúen nas 4 Indicacións Xeográficas Protexidas de Galicia: Adega Ardán, Adega Os Areeiros, Mercedarios do Mosteiro de Poio, Reboraina e Videiras no Mar na IXP Ribeiras do Morrazo; Adega Entre os Ríos, Bodegas Calidade Antonio Saborido, Bodegas Torres Augusti, e Cazapitas na IXP Viños da Terra de Barbanza e Iria; Pagos de Brigante, Casa Beade, Adegas Bordel, Adegas Rilo na IXP Viños da Terra de Betanzos e Adega Terras Mancas e Vides Singulares na IXP Val do Miño-Ourense.

O compromiso destas entidades privadas, é de contribuír ao financiamento do custo do proxecto nunha porcentaxe do 10% dos gastos subvencionables.

Entidades cooperantes

Participan no proxecto os Grupos de Desenvolvemento Rural de Pontevedra Morrazo (Grupo coordinador), Galicia Suroeste Eurural, Mariñas-Betanzos, Comarca de Ourense, Salnés-Ulla-Umia e Deloa (Sar, Barbanza e Muros-Noia).

 

Viños das IXP de Galicia

As Indicacións Xeográficas Protexidas son figuras impulsadas pola Unión Europea para protexer e certificar a calidade e arraigamento de produtos tradicionais dentro dun territorio. Baixo estas indicacións elabóranse en Galicia viños de calidade, auténticos e diversos, mantendo valores artesanais con arraigamento histórico e empregando materias primas naturais coidadas por produtores locais.

Existen actualmente catro Indicacións Xeográficas Protexidas baixo as que se elaboran viños en Galicia:

  • IXP Val do Miño-Ourense. Foi a primeira das IXPs constituídas, con grande arraigamento histórico nas comarcas situadas na zona central do val río Miño, onde se inclúe a depresión de Ourense capital e as súas zonas limítrofes.
  • IXP Viños da Terra de Betanzos. As condicións límite de luz e temperatura son características propias desta zona para obter os seus singulares viños. O río Mandeo e o seu afluente, o Mendo, crean os vales que rodean á cidade de Betanzos, onde se concentran as terras dedicadas ás súas castes autóctonas.
  • IXP Viños da Terra de Barbanza e Iria. A zona baixa do litoral norte da ría de Arousa mais o leito inferior e desembocadura do río Ulla configuran esta comarca costeira onde case a totalidade da superficie dedicada ao cultivo de viñedos se atopa por debaixo dos 150 m sobre o nivel do mar.
  • IXP Ribeiras do Morrazo. A máis nova das indicacións de viño de Galicia traballa dende 2018 pola recuperación dunha cultura vitivinícola moi arraigada socialmente dende un territorio de gran potencial que se resiste ao abandono dos seus viñedos.

 

Publicado en novas

O mércores 13 de outubro, trala celebración de varias reunións de traballo cos viticultores de Cela e outras persoas interesadas, o GDR Pontevedra-Morrazo en colaboración coa Asociación de Vitivinicultores San Martiño de Bueu presentou no Centro Social do Mar as conclusións alcanzadas trala análise de diferentes alternativas para potenciar a viticultura na zona no marco do Proxecto de viabilidade para a comercialización e posta en valor dos recursos vitivinícolas de Bueu dentro da Indicación Xeográfica Protexida Ribeiras do Morrazo.

 

Publicado en novas
Ningún evento vindeiro!